Kidung Agung 5

– Saemo’ lako pa’lak bungangku, e adingku, e dodo’ sangkalamma’ku, kururukmo tu murungku sia pebangki’ku, kukandemo tu tallo’ merangku sola tani’ enoangku, kuiru’mo tu uai anggoro’ku sia pangandu’ku. E mintu’ sangmaneku, la kumandekomi sia mangiru’, sanabossami, e sangmane karra’ku.

Mamma’mo’, apa iatu penaangku pasa’dingpa. Perangiimi, iatu andi’ pa’kaboro’ku undedek ba’ba, nakua: Bungkaranna’ ba’ba, e adingku, e rindungku, e dangan-danganku, e baine adang-adangku, tu tae’ sayuanna, belanna iatu ulungku nabonakki ambun, sia iatu mintu’ beluak ma’lendongku narandangi pini-pini malillin.

Mangkamo kualai tu bayungku, naumba la kukua umpopake pole’i sule? Kubaseimo tu lette’ku, naumba la kukua urruttakki pole’i?

Iatu andi’ pa’kaboro’ku tonna ulu limanna dio to’tok ba’ba, natukka’mo’ penaangku ungkamali’i.

Millikmo’i la umbungkaranni ba’ba tu andi’ pa’kaboro’ku, anna nii muru to’do-to’do tu limangku, sia nale’ke’i muru lolong tu rakka’ku, dio toean salli’ ba’ba.

Kubungkarammi ba’ba tu andi’ pa’kaboro’ku, apa leakmo male! Mallaimi tu deatangku tonna ma’kada, malemo’ undaka’i, apa tae’ kukabu’tui, kutambai apa tae’mo napebaliina’.

Naapparammo’ pa’ronda’, tu male sumalong lan lu kota, anna bambana’ sia nakambeina’, sia naalaina’ tu lullungku, iamotu to ma’kampa dao lu benteng tembo’.

Umpalaona’ sumpa umpokadangkomi, e mintu’ anak dara Yerusalem, ke miapparanni tu andi’ pa’kaboro’ku, apara la mipokada lako? Pokadanni, kumua littuna’ napobua’ kamamaliran.

– Apara losongna tu andi’ pa’kaboro’mu na iatu mintu’ muane senga’, e iko tu tarru’ maelo dio lu mintu’ baine? Apara losongna tu andi’ pa’kaboro’mu na iatu mintu’ muane senga’, ammu palao sumpa umpokadangkanni susito?

– Iatu andi’ pa’kaboro’ku mabusa sia mararang rupanna, iatu rupanna ussau’ tau sangpulo sa’bunna.

Iatu ulunna susito bulaan massang sia bulaan tasak, iatu beluak ma’lendongna tikalulun-lulun sia malotong susi kadoya.

Iatu matanna susito dangan-dangan dio biring salu’-salu’, tu mendio’ lan pangandu’ sia unno’ko’ dio to’ kalimbuang boba.

Iatu popona susito sangtampang oto’ pebangki’, susito sangtempe’ oto’ rampa-rampa, iatu pudukna susito danga-danga, nanii to’do-to’do muru lolong.

Iatu takia’na susito bulaan kalebu, diparimatai parimata Tarsis, iatu kalena susito gading nagaraga to pande paliu, nasitutu’i parimata lasuri’.

Iatu lette’na susito lentong marmar toppo’ dao parandangan bulaan tasak; iatu pati’na susito Libanon, mala’bi’ sangtinti garonto’ arasi’.

Iatu mai lingarona kamatapparan manna, sia iatu mintu’ dio kalena mepasendena manna. Susimo a’ganna to tu andi’ pa’kaboro’ku, susimo garaganna to tu sangkalamma’ku e, mintu’ anak dara Yerusalem.